S-wegĭ Monjelkam

Ṣ hab a cu’i na’ana, kuṣ hema hab ce:gig  S-wegĭ Monjelkam maṣ gm hu ki: tohono c-eḍ. B ’atṣ ’i-e-a: mat o ce:gim g ’e-hu’ul k o ha’i ’u’ukai g cecemait ’am wui. Wenog maṣ ’am him g ’e-hu’ul ki: wui, ’atṣ nam g Ṣe:’e maṣ hab kaij “S-ke:g taṣ! Ba: pt o hi:?”. “’Ant o ce:gim g ñ-hu’ul mo gḍ hu ki: do’ag we:big’”, ’aṣ hab kaij g S-wegĭ Monjelkam. Ṣe:’e ’aṣ hab kaij, “’Oig ṣahali, ’ant o a ’ep m-ñei!” kutṣ gm hu hasko me: mat o ce: g ki:j g S-wegĭ Monjelkam hu’ul. Mat hekid ’am jiwa g S-wegĭ Monjelkam k ’am ñei mo si ge’egḍaj g ’e-hu’ul wu:pui k hab kaij,

“’I:, ṣa’i ’o si ge’egḍaj g m-wu:pui, ñ-hu’ul!” b ’aṣ kaij g S-wegĭ Monjelkam.

“Heu’u, ’ant hab o s-ap ha’icu ñeidad, ñ-mo:s,” b ’aṣ kaij g Ṣe:’e.

S-wegĭ Monjelkam ’atṣ ñei mo si ge’egḍaj g ’e-hu’ul na:nk k hab kaij,

“’I:, ṣa’i ’o si ge’egḍaj g m-na:nk, ñ-hu’ul!”

“Heu’u, ’ant hab o s-ap ha’icu ka:kad, ñ-mo:s,” b ’aṣ kaij g Ṣe:’e.

S-wegĭ Monjelkam ’atṣ ñei mo si ge’ej g ’e-hu’ul da:k k hab kaij,

“’I:, ṣa’i ’o si ge’ej g m-da:k, ñ-hu’ul!”

“Heu’u, ’ant hab o s-ap ha’icu hewagidad, ñ-mo:s,” b ’aṣ kaij g Ṣe:’e.

S-wegĭ Monjelkam ’atṣ ñei mo si s-mu’umk g ’e-hu’ul ta:tamĭ k hab kaij,

“’I:, ṣa’i ’o si s-mu’umk g m-ta:tamĭ, ñ-hu’ul!”

“Heu’u, ’ant hab o s-ap m-ko’ito, ñ-mo:s!” b ’aṣ si s-kaidam kaij g Ṣe:’e k ’am ’i-wamig k ’am huhu’i g S-wegĭ Monjelkam. Wenog maṣ ’am si huhu’id g Ṣe:’e g S-wegĭ Monjelkam, kuṣ hema maṣ hab ce:gig Ho’idkam Ṣonckdam mo ’am mia cipkan ’am ’i ka: maṣ si hi:nk g Ṣe:’e c huhu’id g S-wegĭ Monjelkam k ’am him k ’am si ṣa:mud g Ṣe:’e kutṣ g Ṣe:’e si s-e:biñid k gm hu hi: kutṣ g S-wegĭ Monjelkam pi hekid ’ep ñei g Ṣe:’e.

Heg ’o ḍ ’a’i.