Matṣ g ma:kai ’am ha:ṣañc g 
S-vepegĭ Nonovkam

Ñe:, ba’ic taṣ ’atṣ ’ep jivia g Ceṣoñ Hu:c k hab kaij “Napt o ñ-kunt?” k ’am ma: g ’iks matṣ na:tojul. Kutṣ ’am vegij hegi ’iks heg hekaj bahidaj sitol c ’ep si s-vegĭ g ’iks. Tṣ g S-vepeg Nonovkam ’am a ’ep s-’o:hod k hab kaij matṣ o pi ṣa’i kunt.

Ba’ic taṣ ’atṣ ’ep jivia g Ceṣoñ Hu:c k hab kaij “Napt o ñ-kunt?” k ’am ma: g vecij kuipaḍ matṣ na:tojul. Tṣ g S-vepegĭ Nonovkam ’am a ’ep s-’o:hod k ’am ’u:pam ma:k k hab kaij “Pi ’ant o ṣa’i m-kunt”.

Ṣ ’am si pi ’ap ’e-ta:tk g Ceṣoñ Hu:c k hab ’e-’a: “S hascu ’a:gk o pi ñ-kunt? S hascu ’a:gc pi ñ-ho:hid? No s-ho:hid hema ’ep?”. Tṣ ’am ’i ’e-’a: g Ceṣoñ Hu:c mat o ce:gim g ma:kai k o ba:mud. C hegi ma:kai matṣ ce:gim g Ceṣoñ Hu:c ’aṣ pi ’ap uḍ ma:kai c ’am ’i ha-ve:mt g hemajkam mat pi ’ap has o ju:. Ñe: tṣ g Ceṣoñ Hu:c ’am ’a:gĭ g ma:kai maṣ has kaij g S-vepegĭ Nonovkam k ’am kakke “K hascu ’a:gc pi taicu mat o ñ-kunt? No s-ho:hid hema ’ep?”. Ṣ ’am ’i ku:kp g ’e-vu:pui g ma:kai k ’am ’i ’a: g ’e-ñe’i. Matṣ ’am ’i ha’asa ñe’e k ’am ’i ku:kpio g ’e-vu:pui k hab kaij “Hegi map cem s-ho:ñimk ’o pi ho:hid hema ’ep. Ṣaba pi ṣa’i taicu mat o m-kunt.” Ṣ ’am ’i si bagat g Ceṣoñ Hu:c. K ’am hahava hab kaij g Ceṣoñ Hu:c, “Ṣa: nt o ñ-ju: hahava?”. Ṣ hab kaij g ma:kai, “’Ant o va has ju: g S-vepegĭ Nonovkam, t o pi hema ’ep kunt. Hema ’i ñ-be:kai g ’eñigaj, nt ’am o va has ju:.” Ṣ ’am si s-baga g Ceṣoñ Hu:c k ’am a s-ho:hid mo has ’i kaij g ma:kai.

Tṣ ’am jivia g Ceṣoñ Hu:c S-vepegĭ Nonovkam ki: ’am, ṣ ’am pi haicug g S-vepegĭ Nonovkam natṣpi hekĭ hu ’iam. Ceṣoñ Hu:c ’atṣ hema ce: g ha’a maṣ ’am ’eḍa ce:kc g bahidaj sitol g S-vepeg Nonovkam. Ku:pio ’atṣ g ha’a k ’am ’i vas g sitol. Tṣ gḍhu be:kai wui g ma:kai k hab kaij, “’I:da ’o ḍ sitolgaj mat ’am na:to g S-vepegĭ Nonovkam”. Ma:kai ’atṣ ’am bei k ’am ’a: g ’e-ñe’i ’am ’i ’ua’akc g sitol. Ṣ ’am hahava ’iawua g sitol hema la’as ha’a ’eḍ k ’am ’al ha’icu wua sitol c-eḍ tṣ ’am ’i si ’ioligĭ. Tṣ ’am ’u:pam ma: k hab kaij “Ma:k ’i:da g S-vepegĭ Nonovkam mat o ’i:, pt ’am hahavo tamia gi’ik taṣ ’ab. Pt ’am ’ep o jivia heg wui mat ḍ o gi’ik taṣk k o kakke mat o m-kunt. Mat ’ep o ṣa s-m-’o:ho, ’apt o va ñei mat has o ju:.” 

Ceṣoñ Hu:c ’atṣ ’am bei g ha’a k ’am him k ’am dagĭto ’am ba’ic g ki:j g S-vepegĭ Nonovkam. Matṣ hekid ’ep jivia g S-vepegĭ Nonovkam k ’am dai g ’e-giho k ’am ’i va: ki:-ceḍ mat o ha’icu bei. Tṣ ’am ñei g la’as ha’a mo ’an ku:paḍag hugtan dahă. Ṣ ’am a be k ’i ku:pio k ’am ñei maṣ ḍ bahidaj sitol ṣaba pi ma:c mas heḍi ’am dagĭto. Ṣ ’am a si s-na:k g bahidaj sitol k ’am ’i’ito k ’am ’ep ’i cipk.

Ñe: ṣ ’am ḍ ’i gi’ik taṣ, tṣ ’am ep jivia g Ceṣoñ Hu:c k hab kaij, “S-vepegĭ Nonovkam, ’id ’o ḍ si ’oidckam mant o m-ce:gim. ’Ant ’ep o m-kakke ha’icu. Napt o ñ-kunt?” Ṣ hab kaij g S-vepegĭ Nonovkam ’am wui, “S-ap g ñ-kaiham, Ceṣoñ Hu:c, pi ’añ ṣa’i taicu mant o m-kunt. Pi g ’ab hu ṣa’i ñ-ce:gimeḍ ’ep.” Ṣ ’am sikol ’i kekiwua k ’am cem hi: hasko ṣ ’am si s-ko’ok g vo:kaj k ’am ’abṣ ’i kekiwua. Ṣ ’am hahava si s-kokok g kakhioj c ’ep si s-ko’ok g ’o:ḍ, ṣ hab ṣa ta:hadag maṣ ve:sko ’i ’e-vantṣp g ’eldaj. Ṣ ’am si hi:nk k hab kaij “S-ko’ok ’o! S hascu has ñ-ju:?” 

Ṣ ’am ’i ñei g ’e-kakkio k ’am a ñei maṣ ’am si ’e-vantṣp g ’eldaj k ’an ’eldaj veco ge s-cehedagĭ g cu:kug. Ṣ ’am ’i ’e-hemakocud g kakkioj masma mo g ṣonaj g ha:ṣañ maṣ ’am ’i ’ai g huḍaj. Ṣ ’an ve:sko ’i vuvha g hoho’i cu:kugaj ’an, c ’am vavpañim ’i vuvha ha’i g hoho’i wuhioṣaj ’an, c ’ep vavpañim ’i vuvha g hoho’i g nonovij ’ab c ’an koktvaj ’an, c ’an mo’oḍ ’an ha’i ’i vuvha g si s-vepegĭ bahidaj c hab ṣa cu’ig mo g gi:koa mo ’an dahă mo’oḍ ’an. Ve:s ’i:da ’aṣ hab uḍ ma:kai juñ. Ṣ ’am ’ep ’i ñei g ’e-kakkio k ’am ñei matṣ ’am ge ’e-ha:ṣañc. Ṣ ’ab ha-ñei g ’e-nonov k ’am ñei maṣ ’an ve:sko ’iajiḍ g hoho’i c ’abṣ ge s-cehedagĭ g ’eldaj. Ṣ ’an ṣa ta:t g ’e-wuhioṣa k ha-ta:t g hoho’i matṣ ’an ’i vuvha ka:kamaj ’an, ṣ ’an ta:t g ’e-mo’o k ha-ta:t g bahidaj mo ’an sikolim daḍha mo’oḍ ’an. Ṣ ’am ’i cem hi: hasko ṣaba pi ṣa’i ’e-nakog. Ta:taḍij ’aṣ hab cu’ig mo g ha:ṣañ tatk matṣ ’am si s-ju:k ’i va:p jeveḍ c-eḍ. Ñe: ṣ ’an dahă g va’igkuḍ maṣ a hekaj vasib g ṣu:dagĭ c ’an hejel ’e-ñeid ṣu:dagĭ c-eḍ. Ṣ ’am si hi:nk c ṣoak. Ṣ ’am ’i si ’e-tots g Ceṣoñ Hu:c c ’am ’i ta’i hi: ’am ’i ñeidk matṣ has ’e-ju:, ṣ ’am gm hu ’i me:. Ṣ g S-vepegĭ Nonovkam ’abṣ ’am ke:k c hi:nk c si ṣoak. 

Ṣ ’am ’i ke:k c ṣoak gi’ik taṣ ’ab, pi ṣa’i ha kakkio c ’oia hab pi ṣa’i ’e-nakog mat o hasko hi: taḍkaj. C ’ep pi ṣa’i ma:c mas has ’e-ju: ’am ta:gio. Ṣ ’am ḍ ’i gi’ik taṣ tṣ ’am ce:gim g pi ’ap ma:kai g S-vepegĭ Nonovkam. Matṣ ’am ce: tṣ ’am a ñeid k ’am ’abṣ hehem k hab kaij “Ḍ ’añ si ma:kai! Ñeid ’i:da mant has m-ju:. Mapt ’am a s-’o:ho g Ceṣoñ Hu:c kut heg ñ-kakke mant o pi ’ap has m-ju:. Ḍ ’añ si ma:kai! Pi ’o heḍi si s-gevk masma mañ ’a:ñi!”. Tṣ ’ab ñei g S-vepegĭ Nonovkam g ma:kai tṣ ’am ’i ’amic mat has ’e-ju:. Hegi ma:kai ’atṣ ha:ṣañc g S-vepegĭ Nonovkam. Si ’atṣ bagat g S-vepegĭ Nonovkam k ’am ’i si cevada c ’am ’ep si gevka. Ma:kai ’aṣ ’ab ñeid tṣ ’am si ’e-totsid k gigivk c pi ṣa’i hoin. S-vepegĭ Nonovkam ’atṣ ’am ’i huḍuñ k ’am bei g ma:kai. Mu’i hoho’i ’aṣ ’an ’iajid g S-vepegĭ Nonovkam nonovĭ tṣ ’am ’i si s-ju:kam ho’iṣ g ma:kai. Si ’atṣ hi:n g ma:kai naṣpi si s-ko’ok. Ṣ g S-vepegĭ Nonovkam ’am ’u:gk ’i be k hab kaij “’Id ’o hab ḍ m-juñ”. Ṣ ’am si hi:nk g ma:kai ṣ ’am ’abṣ ’i s-gevkam ha-vañckwua g S-vepegĭ Nonovkam g nonovij c kakkioj g ma:kai, ṣ ’am ’eḍa ’i vantp g ma:kai cu:kug. ’Am a kiap ṣa doa g ma:kai ṣ ’am ’u:gk ’i bei g wuhioṣaj c ’ab ñeid c ’ab kaij “Id ’o ḍ m-cu’ijig” tṣ ’am ’i mu: g ma:kai. 

Tṣ ’am ’i wua g cu:kugaj g ma:kai ’eḍa g vahia mo ’an mia ke:k. Ṣ pi ṣa’i pi ’ap ’e-ta:tk, ṣ ’am hahava si s-baga tṣ hab ’i ’e-’a: mat o him k o ce:gim g Ceṣoñ Hu:c k o ’e-agwua. Pi ’aṣ ṣa’i ’e-nakog mat o hasko hi: taḍkaj, c ’ep pi ma:c mas has masma o ce: g Ceṣoñ Hu:c. Ṣ ’am si ’oidahim k ’oidahim tṣ ’am hahava si s-ko’ok g vo:kaj natṣpi pi ha’icu hu:. 

Tṣ ’am hema ñei g kui mo ’an ṣa me:k ke:k. C ’ep mu’i viohogt g kui kuṣ g S-vepegĭ Nonovkam ’am si s-beimk g viohog mat o vi:p. Pi ṣa’i ’e-nakog mat ’am o hi:, c ’am si s-ko’ok g vo:kaj, ba’ic ’i s-ko’ok mo hekĭ hu, ’am a si bihugim. Ñe:, heg ’aṣ kiap si cegĭto ’ab ’amjeḍ g viohog c ’am si s-hugimk tṣ ’am hahava ’e-cuhug. Matṣ ’am ’i ñia k ’am a ñei mo ’am ba’ic ’i mia ke:k g kui. Ṣ hab ’i ’e-’a:g “Ṣa: nt masma ’i ñ-himc?”. Ṣ ’ab ’ep ñei g kui k ’am cem bei g viohog ṣaba pi ’ai. Ṣ ’am ’ep ’i s-ko’ok g vo:kaj c ’am si s-hugimk g s-io’ovĭ viohog k ’am ’ep ’i ul g ’e-nov tṣ ’am a hekaj ’i cevada g novij tṣ ’am ’ai g kui k ’am ha’i ’ui g viohog k ’u:pam ’i vañckwua g ’e-nov k ’am ’ep ’i ṣopolka. 

Ṣ ’am a vi:ñ g viohog c ’oidahim mas has ’e-ju: k ’am ’e-miabĭ g kui. Tṣ ’am ’i mai maṣ pi ṣa’i ’e-nakog mat o hasko hi: taḍkaj, ṣaba hiva si ’e-nakog mat o hasko ’e-himc ’ab hema ha:ṣañ ’amjeḍ ’am wui hema ’ep ha:ṣañ. Mat o ṣa pi ’ai ha’icu, k ’abṣ o ce’ecvadaj g ’e-nonov k o ’ai. Tṣ ’am ’ep ’i mai matṣ ba’ic ’i gevka ’eḍa matṣ g ma:kai ’am ha:ṣañc k heg hekaj ’am si ’eḍa ’i vantp g cu:kugaj g ma:kai. Tṣ ’am ’ep ’i mai mat has masma o ’e-agwua heg hekaj matṣ has ’e-ju: ’am ta:gio.

Tṣ heg ’ai s-cuhugam, ’am a tamai mat o ’i huḍ g taṣ k o ko:k ve:sij ki:him c-eḍ. Ṣ ’am cegĭto ’ab ’amjeḍ g Ceṣoñ Hu:c ki:. Ṣ ’am ha’i mia cu:c g hahaṣañ ’an ve:gaj g ki:j g Ceṣoñ Hu:c. Ṣ ’am si cegĭto ’ab ha-’amjeḍ tṣ ’am ve:s ’i cuku masma mat ’e-cuhugĭ tṣ ’am ’ep ku:kpio g ’e-vu:pui c ’am Ceṣoñ Hu:c ki: miabidc ke:k. Ṣaba kiap ṣa me:k ke:k g ki:j, tṣ ’am ’i ’u:’ul g ’e-nonov tṣ ’am si ce’ecvada. Tṣ ’am ku:pio g ku:paḍaj g ki:, ṣ g Ceṣoñ Hu:c ’am ’eḍa ko:ṣ, tṣ g S-vepegĭ Nonovkam ’am si ma’iṣ g ciñij k ’am ’ep ha-’ui g ta:taḍij k ’i vu:ṣad. Ṣ ’am taicu g S-vepegĭ Nonovkam mat o bei ’u:pam mat ’am mua g ma:kai. Tṣ ’am ’i da’ic Ceṣoñ Hu:c, k ’am ’e-himc ’ab hema ha:ṣañ ’amjeḍ wui hema ’ep ha:ṣañ k ’am ’ep bei g Ceṣoñ Hu:c k ’am hi va da’icudahim g Ceṣoñ Hu:c c hejel ’e-himcudahim hab masma tṣ ’am hahava dada ’u:pam. 

Matṣ ’am ’i dada ’u:pam, ṣ ’am ’iajid g hoho’i g ceoj, c ’an ve:sko ’e’eḍopa. Ṣ ’am ’abṣ ṣoak c hab kaij “Ṣa:cu p taicu? P hascu ’a:gc hab ñ-wua?” Ṣ ’am a bei g S-vepegĭ Nonovkam g ceoj tṣ ’am si s-ju:kam ho’iṣp g huḍaj g ceoj, ṣ ’am si hi:nk tṣ g S-vepegĭ Nonovkam ’u:gk ’i be k ’ab ñeid k hab kaij “’Id o hab ḍ m-juñ”. 

Ñe: tṣ ’am mu’ikpa hiktṣ g ceoj g S-vepegĭ Nonovkam g  ’e-hoho’igakaj, k ’am si hiktṣ k si hiktṣ c g ’eldaj g ceoj hab ṣa ma:s mo g mu’i liliston, c ’an si ñe’iopa g ’e:’eḍaj tṣ g S-vepegĭ Nonovkam ’i naggia g Ceṣoñ Hu:c ’ab ’ab g ha:ṣañ m-an hugtan ke:k. Ṣ ’am a kiap ṣa doa g ceoj ṣaba pi ṣa’i ’e-nakog mat o has cei naṣpi ’i ñe’iopa g ’e:’eḍ ’ab ciñij ’amjeḍ c ’abṣ si ’i’ihog c ’an naggia, ṣ hab kaij g S-vepegĭ Nonovkam, “’Id o ḍ m-cu’ijig”.  

Ñe: ṣ ’an he’es ’i naggiahim g Ceṣoñ Hu:c c kiap doa, ṣ ha’i dada g ’u’uvĭ maṣ ’an ’oyopo c ga:ghim g takui, ṣ ’am a ñei g Ceṣoñ Hu:c k si hihin. Ṣ hab kaij g Ceṣoñ Hu:c, “S-vepegĭ Nonovkam ’at ñ-mua” k ’am ’i mu:. Tṣ g ’u’uvĭ ’u:pam vo:p ki:him wui. 

Ñe: k ’amjeḍ hab hi va ’e-’a:g mo hema ’oimeḍ Tohono c-eḍ mo hab ma:s mo g ha:ṣañ c ’an ve:sko kaidag g S-vepegĭ Nonovkam ho’ok ’a:gida. 

© 10/17/2024