Juḍum c Hohokimal

Ṣ hab a cu’i na’ana, kuṣ ha’i hab cecgig Juḍum c Hohokimal maṣ wuḍ ’e-wepnagam. Kutṣ ’am hu hebai g ha-je’e ha-’a:gĭ, “’Ant o him k o ’ui g takui. ’A:pim ’amt o daḍhakad ’i:ya c o ñ-ñe:nda. Mant hekid o jiwa ’u:hum, ’ant o ’em-gegos. Mamt o ṣa bihugk mant koi o jiwa, ’oi g o hu:gĭ g cecemait mo ’am wi’is.” Kutṣ ha-dagĭto ki: t-am k ’am ha-a:gĭ, “S-ap ’o ’e-ñu:kudad. S-hottam ’ant ’ep o jiwa.”

Ṣ ’am him kutṣ ’am si bihugk g Juḍum c Hohokimal. Hegam ’atṣ we:s ha-hu: g cecemait, kuṣ ’abṣaba pi ṣa’i kokwok. B ’atṣ ’i-e-a: hegam mat o ga:gio g ’e-je’e. Juḍum ’aṣ hab kaij, “’Oig ’att o ga:gio g t-je’e k o ’a:gĭ mac pi ṣa’i kokwok. ’At o jiwa ’u:hum k o t-gegos.” “’Oig ’att o hihi!” b ’aṣ kaij g Hohokimal.

Hegam ’atṣ ’oi g wo:g mo ’ab ’ab hihhim g ’e-je’e mat o ’ui g takui. Kutṣ hahawa ’aṣ si ju:. Mu’i ’atṣ ju: kuṣ pi ṣa’i ’ap ñeid g wo:g g Juḍum c Hohokimal kutṣ heb hu wua g wo:g.

Kuṣ ’am hihim k ’am hihim k ’am ñeid mo ’am ke:k g ki:. Hema ’aṣ wuḍ ho’ok ’okṣ maṣ ’am ki:. S-ta-’e:bidama ’aṣ wuḍ ’o’odham hegai ho’ok ’oks kuṣ we:s g hemajkam ’am ha-cihañ g ’a’al mat pi hekid o hihi ki:j wui. T ’abṣaba pi hekĭ hu ñei g Juḍum c Hohokimal g ho’ok ’oks ki: kuṣ pi ma:c mas wuḍ hegai maṣ ’am ki:. Ki:j g ho’ok ’oks ’aṣ hab ’u:w mo g mu:ñ c ko’okol hi:doḍ c cecemait c gaiwsa. Ho’ok ’oks ’aṣ ha-ka: g Juḍum c Hohokimal maṣ ’am ’oyopo jekkaḍ kutṣ ’am ’i-wu:ṣañ k hab kaij, “’Ab g o ’i-wa:pk! ’Em-jukṣp ’o! ’I-wa:pk k ñe:nda ki: c-eḍ!”

Juḍum c Hohokimal ’atṣ ’am ’i-wa:p k daḍiwa. Ho’ok ’oks ’aṣ hab kaij, “Namt bihugk? Hihido ’ant g mu:ñ. Biawo!” Kuṣ ’am ’i cem bia g mu:ñ g Juḍum c Hohokimal kutṣ ’am ha-’ui g ho’ok ’oks k ’am ha-ṣul g ge’e bid ha’a c-eḍ k ’am si ma’iṣ. Ho’ok ’oks ’aṣ si hehem k hab kaij, “’Ant o a s-ap ñ-gegos!” Juḍum c Hohokimal ’aṣ pi  ha’icu ’e:bid natṣ pi g ha-je’e hekĭ hu ha-maṣca mat has masma o s-ap ’e-ñu:kudad. Juḍum c Hohokimal ’atṣ si s-gewkam ñuickwua g ha’a ma’iṣpadag k ’am ’i ñe’iopa. Hohokimal ’atṣ bei g ha’a ma’iṣpadag k ’am si ṣoñhi g ho’ok ’oks kutṣ g ho’ok ’oks ’i-gei ha’a c-eḍ kutṣ ’u:hum wo:p g Juḍum c Hohokimal kutṣ pi hekid ’ep ñei g ho’ok ’oks.  

Heg ’o ḍ ’a’i.